Saga Bókasafns Akraness

Langflest bókasöfn landsins voru upphaflega lestrarfélög, sem störfuðu í almenningsþágu.Þann 6. nóvember  árið 1864 stofnaði Hallgrímur Jónsson hreppstjóri í Guðrúnarkoti ásamt Æfingafélaginu, sem þá starfaði hér með miklum blóma, lestrarfélag á Akranesi. Þau félagasamtök, sem mest létu að sér kveða í íslenskum sveitum og þorpum eftir aldamótin, voru ungmennafélögin og góðtemplarastúkurnar. Þessi félagasamtök beittu sér fyrir fjölda göfugra málefna til almenningsheilla. Hér á Akranesi létu þessi félög

málefni Lestrarfélagsins mjög til sín taka.
 

Fyrsti framkvæmdastjóri Lestrarfélagsins á vegum stúkunnar var Níels Kristmannsson, síðan tók Sveinbjörn Oddsson við því starfi árið 1925 og var hann starfandi við safnið með hléum allt til ársins 1960. Sveinbjörn tók m.a. upp sjálfsafgreiðslu bóka, sem flestum leist illa á í byrjun. 
 

4. desember 1946 brann Bókasafnið, sem þá var til húsa í gamla Barnaskólanum. Allt brann til kaldra kola, nema lítill hluti sem var í útlánum. Í þessum bruna brann m.a. sá hluti sýslubókasafnsins, sem féll í hlut Akurnesinga, þegar Akranes hlaut kaupstaðarréttindi. Bókaeign fyrir brunann var um 3000 bindi. Að tveimur árum liðnum tók safnið aftur til starfa. Uppistaða þess var einkabókasafn keypt af Guðmundi G. Hagalín rithöfundi. Bókasafnið var þá í húsakynnum bæjarins að Kirkjubraut 8 allt til ársins 1971 en það húsnæði var frekar lélegt. Safnið tók síðan til starfa á Heiðarbraut 40, Bókhlöðunni, 26. febrúar 1972. Árið 1976 var opnuð sérstök barnadeild innan safnsins og lessalur fyrir fullorðna skömmu síðar.

Á myndinni sem tekin var árið 1972, er Ásta Ásgeirsdóttir bókavörður að afgreiða fyrsta viðskiptavin sinn í nýja húsnæðinu að Heiðarbraut 40.  Ásta hóf störf við bókasafnið 1. okt. árið 1958 og á lengstan starfsferil allra þar. Ásta lét af störfum árið 2005, eftir 47 ára starf. Viðskiptavinurinn er dóttir hennar, María Hlinadóttir.

Árið 1990 var tímamótaár í sögu safnsins. Þá var keypt til safnsins tölva og hugbúnaður og hafinn tölvuskráning á safnkostinum. Keypt var norskt kerfi, MikroMarc, sérhannað fyrir bókasöfn. Útlánahluti kerfisins var tekinn í notkun í maí 1998. 

Frá og með árinu 2007 var rekstur Ljósmyndasafns og Héraðsskjalasafns færður til Bókasafns Akraness.
Árið 2002 var nafni safnsins breytt í Bókasafn Akraness.
Á 145 ára afmælisári safnsins eða 1. okóber 2009 opnaði Bókasafn Akraness í nýju húsnæði að Dalbraut 1. 

Forstöðumenn safnsins eftir 1925
Sveinbjörn Oddsson 1925-1960

Þóra Þorleifsdóttir, 1960-1961
Sveinbjörn Oddsson 1961-1962
Sigrún Guðjónsdóttir, 1962-1965
Snæbjörn Jóhannsson, 1965-1970
Stefanía Eiríksdóttir, 1970-1980
Sigríður Árnadóttir og Halldóra Jónsdóttir, 1980-1992
Sigríður Árnadóttir, 1992-1997
Halldóra Jónsdóttir, 1998-